പാലക്കാട് ആലത്തൂരും കോഴിക്കോട് വിലങ്ങാടും ഉരുള്പൊട്ടല് ; നിരവധി വീടുകള് തകര്ന്നു ; ഒരാളെ കാണാതായതായും റിപ്പോര്ട്ട്
- by jayan thomas
- July 30, 2024
കോഴിക്കോട് : വയനാട്ടിലെ മേപ്പാടിക്ക് പിന്നാലെ കോഴിക്കോട് വിലങ്ങാടും പാലക്കാട് ആലത്തൂരും ഉരുള്പൊട്ടല്. കോഴിക്കോട് ജില്ലയിലെ വിലങ്ങാട് ഉണ്ടായ ഉരുള്പൊട്ടലില് പത്തിലധികം വീടുകളും നിരവധി കടകളും മലവെള്ളപ്പാച്ചിലില് ഒലിച്ചു പോയതായി റിപ്പോർട്ടുകള് സൂചിപ്പിക്കുന്നു.
വിലങ്ങാട് പ്രദേശത്ത് ഉരുള്പൊട്ടലിനെ തുടർന്ന് നാല്പതിലധികം വീടുകള് ഒറ്റപ്പെട്ടു. മലവെള്ളപ്പാച്ചിലില് വിലങ്ങാട് മലയങ്ങാട് പാലം ഒലിച്ചുപോയി. ഈ പ്രദേശത്തെ ആളുകളെ ഇന്നലെ തന്നെ ദുരിതാശ്വാസ ക്യാമ്ബിലേക്ക് മാറ്റിയിരുന്നതിനാലാണ് വലിയ ദുരന്തം ഒഴിവായത്. ഉരുള്പൊട്ടലില് പ്രദേശത്തെ റോഡുകളെല്ലാം തകർന്ന അവസ്ഥയിലാണ്. എൻഡിആർഎഫ് സംഘം വിലങ്ങാട് എത്തിയിട്ടുണ്ട്.
പാലക്കാട് ആലത്തൂരിലെ കാട്ടുശ്ശേരി വീഴുമലയിലാണ് ഉരുള്പൊട്ടല് ഉണ്ടായത്. വലിയ രീതിയിലുള്ള മലവെള്ളപ്പാച്ചില് ഉണ്ടായെങ്കിലും സംഭവത്തില് ആളപായം ഉണ്ടായതായി റിപ്പോർട്ടുകള് ഇല്ല. കനത്ത മഴയെ തുടർന്ന് ആലത്തൂരിലെ നിരവധി മേഖലകളില് രൂക്ഷമായ വെള്ളക്കെട്ട് ഉണ്ടായിട്ടുണ്ട്. നിരവധി വീടുകളിലും വെള്ളം കയറി.